У Наваполацку жыхары дамагліся рамонту двароў

У дварах дамоў №137 і 145 па вуліцы Маладзёжнай у Наваполацку камунальнікі заасфальтавалі дарогі, зрабілі ходнікі і месцы для парковак. Каб мясцовая ўлада звярнула ўвагу на праблему занядбанасці двароў, давялося правесці грамадзянскую кампанію. Распавядае актывіст  “Гавары праўду” Яраслаў Берніковіч:

“Кампанію мы распачалі ў Наваполацку яшчэ ў снежні мінулага году. Да мяне звярнуліся сябры, якія паведамілі, што дарогі разбітыя, як пасля Сталінградскіх баёў. Я кажу, давайце пазбіраем подпісы і паглядзім, што з гэтага атрымаецца. Сабралі подпісы, выслалі іх мясцовым ўладам, прыходзілі адказы, што праблему яны разумеюць, аднак на яе вырашэнне няма сродкаў”.

Актывіст адзначае, што ўздымаў праблему рамонтаў двароў таксама і падчас сваёй перадвыбарчай кампаніі, калі балатаваўся ў Палату прадстаўнікоў пятага склікання. Каб неяк разварушыць мясцовыя ўлады, актывісты сабралі больш за 300 подпісаў у праблемных дварах. Подпісы яны выслалі мясцовым чыноўнікам. Актывісты палічылі, што такой колькасці падпісантаў будзе дастаткова, каб улады нарэшце звярнулі ўвагу на калектыўны зварот.

Калі ж днямі Яраслаў Берніковіч наведаў Наваполацк, то ўбачыў, што праблема ўжо вырашаная. Працягвае Яраслаў Берніковіч:

Улады ў дварах праводзілі сходы мясцовых жыхароў. Праўда, першы раз на такі сход прыйшлі ўсяго два чалавекі. Аднак наступныя сходы збіралі па 20 і болей чалавек. Там людзі ўздымалі не толькі пытанні рамонту двароў. Паслухаць усё гэта было вельмі цікава”.

Актывіст кампаніі “Гавары праўду” задаволены праробленай працай і кажа, што нягледзячы ні на што, уладу можна падштурхоўваць да нейкіх дзеянняў. Галоўнае, каб знаходзіліся ініцыятыўныя людзі, якія могуць давесці справу да канца.

Рубрыка “Ты можаш” спецыяльна для праваабарончай праграмы Кардыяграма.