Самы багаты чалавек свету становіцца яшчэ багацейшым не па днях, а па гадзінах

Кампаніі амерыканскага мільярдэра і будучага кіраўніка "Дэпартамента эфектыўнасці ўрада" ў кабінеце Дональда Трампа Ілана Маска імкліва растуць у цане, піша Axios.

Акцыі растуць, інвестары задаволеныя

Стартап Маска ў галіне штучнага інтэлекту xAI, стваральнік чат-бота Grok, прыцягвае да 6 мільярдаў долараў пры ацэнцы ў 50 мільярдаў долараў.

Тым часам яшчэ адна кампанія мільярдэра, SpaceX, рыхтуе тэндарную прапанову, у рамках якой ракетная кампанія будзе ацэненая больш чым у 250 мільярдаў долараў, што вышэй за 210 мільярдаў долараў, агучаных раней у 2024 годзе.

Спрыяе Ілану Маску і рынак акцый.

Акцыі Tesla знаходзяцца на ўздыме з таго часу, як Трамп перамог на выбарах прэзідэнта ЗША, падскочыўшы больш чым на 25% з моманту закрыцця таргоў на ўзроўні $251,44 5 лістапада, павялічыўшы рынкавы кошт прыкладна на $225 млрд.

Адзінае выключэнне ў гэтай чарадзе поспехаў — "Х" (былы "Твітар"). З таго часу, як Маск набыў яго два гады таму, адзін з ключавых інвестараў здзелкі, Fidelity, знізіў кошт сацсеткі на 79% на фоне адтоку рэкламадаўцаў.

Колькі грошай у Маска?

Паводле дадзеных на 15 лістапада 2024 года, багацце Ілана Маска ацэньвалася ў 303,7 мільярда долараў ЗША. Для параўнання: у 2020 годзе "скарбонка" бізнесмена ацэньвалася ў 24,6 мільярда долараў.

Ілан Маск на сёння ўзначальвае спіс самых багатых людзей свету. На другім месцы ў рэйтынгу Forbes ідзе былы кіраўнік Oracle Лары Элісан з 224,8 мільярда, на трэцім — заснавальнік Amazon Джэф Безас з 219,4 мільярда долараў.