Сетку "Алмі" аштрафавалі за перавышэнне цэн на сацыяльна значныя тавары

Эканамічны суд Мінска аштрафаваў гандлёвую сетку "Алмі" за перавышэнне цэн на сацыяльна значныя тавары. Парушэнне выявілі спецыялісты Міністэрства антыманапольнага рэгулявання. МАРГ звярнуўся ў суд.

Суд пагадзіўся — парушэнне заканадаўства было. Яно выявілася "ў рэалізацыі тавараў, цэны на якія сфарміраваныя з перавышэннем устаноўленых упаўнаважанымі дзяржаўнымі органамі гранічных памераў гандлёвых надбавак", гаворыцца ў пастанове суда.

Сетку аштрафавалі на 19 тысяч 283,02 рубля. Штраф у 96 рублёў выпісалі супрацоўніку кампаніі, які адказваў за правільнасць фармавання цэн.

Нагадаем, раней МАРГ праз суд ужо штрафаваў некаторыя буйныя гандлёвыя сеткі за завышэнне цэн на гародніну, у тым ліку і "Алмі".