У Беларусі можа знаходзіцца каля 200 вагнераўцаў — "Беларускі Гаюн"
Аляксандр Лукашэнка працягвае гуляць ролю "галоўнага спецыяліста" па ПВК "Вагнер" / t.me/dw_belarus/
У Беларусі можа знаходзіцца каля 200 вагнераўцаў. Іх заўважылі на тэрыторыі вайсковага палігона "Лосвіда" ў Віцебскім раёне. Мяркуецца, што вагнераўцы навучаюць некалькі падраздзяленняў беларускага войска стральбе. Маштабнага перамяшчэння ў Беларусь наймітаў з Расіі пакуль не зафіксавана, паведамляе "Беларускі Гаюн" са спасылкай на свае крыніцы.
Палігон "Лосвіда" знаходзіцца прыкладна за 52 кіламетры ад мяжы з Расіяй і за 150 кіламетраў ад мяжы з Латвіяй.
На сустрэчы з журналістамі 6 ліпеня Аляксандр Лукашэнка сцвярджаў, што вагнераўцы яшчэ не прыбылі ў Беларусь, яны дагэтуль знаходзяцца ў сваіх лагерах на акупаванай тэрыторыі Украіны ці ў РФ. Больш таго, ён прызнаўся, што пытанне іх перадыслакацыі ў Беларусь пакуль не вырашана. Паводле яго слоў, Яўген Прыгожын знаходзіцца ў Расіі, з ім ён размаўляў апошні раз 5 ліпеня.
"Мы прапанавалі ім некалькі былых вайсковых гарадкоў, якія выкарыстоўваліся ў савецкі час, у тым ліку пад Асіповічамі, калі яны пагодзяцца, — гаварыў Лукашэнка. — Але ў ПВК "Вагнер" іншае бачанне па размяшчэнні (зразумела, што пра гэта бачанне я вам не скажу)".
