У садках, школах і шпіталях Мінска ацяпленне ўключаць з 1 кастрычніка

У дзіцячых садках, школах, шпіталях і іншых сацыяльных аб'ектах Мінска з 1 кастрычніка пачынаецца ацяпляльны перыяд. Адпаведнае рашэнне прынялі ў Мінгарвыканкаме, пішуць "Мінск-Навіны".

Згодна з новымі нормамі ацяпленне сёлета ў сацыяльных аб'ектах уключаюць пры сярэднясутачнай тэмпературы ад +10 і ніжэй, калі яна захоўваецца на працягу трох дзён запар.

Раней ацяпленне ўключалі, калі такая тэмпература трымалася цягам пяці дзён.

У жылых дамах, установах культуры ды іншых установах адукацыі батарэі стануць цёплымі, калі сярэднесутачная тэмпература паветра тры дні запар не будзе перавышаць +8.

У апошнюю чаргу цяпло дадуць у адміністрацыйныя, прамысловыя і іншыя арганізацыі, вытворчыя будынкі.