Беларус Генадзь Караткевіч зноў выйграў Google Code Jam
На спаборніцтвах Google Code Jam беларускі праграміст Генадзь Караткевіч зноў заняў першае месца. Наш суайчыннік перамагае на гэтым конкурсе чацвёрты год запар. Сёлета конкурс спартыўнага праграмавання праходзіў у Ірландыі, у дублінскім офісе кампаніі.
Як паведамляе tut.by, Караткевіч набраў 120 ачкоў, яго два бліжэйшыя сапернікі адсталі ад беларуса на 10 ачкоў. Агулам у конкурсе ўдзельнічалі 26 праграмістаў.
Пераможца Google Code Jam аўтаматычна трапляе ў фінал наступнага турніру. Таксама яму даецца магчымасць паступіць на працу ў кампанію і 15 тысяч долараў прызавых.
Генадзь Караткевіч скончыў школу ў Гомелі, у 2012 годзе паступіў ва Універсітэт інфармацыйных тэхналогій, механікі і оптыкі ў Санкт-Пецярбургу. Ён выйграў мноства спаборніцтваў па спартыўным праграмаванні: першыя месцы наш суайчыннік заваяваў на VK Cup, Russian Code Cup, TopCoder Open, Яндэкс.Алгарытм, Facebook Hacker Cup ды інш.
