Еўрапейскі суд па правах чалавека забараніў РФ выдаваць РБ Вадзіма Дубойскага

Еўрапейскі суд па правах чалавека (ЕСПЧ) 20 кастрычніка прыняў рашэнне па справе беларуса Вадзіма Дубойскага. Адвакат Дубойскага прасіў забараніць экстрадыцыю мужчыны з Расіі ў Беларусь, таму што на радзіме яго могуць чакаць катаванні. ЕСПЧ пагадзіўся з довадамі адваката і забараніў выдачу Дубойскага. Пра гэта паведамляе БелаПАН са спасылкай на сястру Вадзіма.

Сёння ў апеляцыйным судзе Масквы адбудзецца разгляд скаргі адваката Дубойскага на выдачу ў Беларусь.

Дубойскаму 31 год. Ён з Брэста, у жніўні 2020 года яго затрымалі і збілі. Пры гэтым пратакол на яго не складалі. Але, выйшаўшы з міліцыі, мужчына зняў пабоі. Пасля гэтага на яго завялі справу аб удзеле ў масавых беспарадках. Санкцыя па гэтым артыкуле прадугледжвае да 8 гадоў пазбаўлення волі. Увосень 2020 года Дубойскі з'ехаў у Расію. Праз паўгода яго там затрымалі па запыце беларускіх уладаў. 

У канцы верасня, не дачакаўшыся апеляцыйнага суда, брастаўчаніна ўжо ледзь не экстрадавалі ў Беларусь. Адвакат з памочнікам суддзі знайшлі Дубойскага ў Курску — гэта за 150 км ад Белгарада, дзе ён павінен быў знаходзіцца ў СІЗА. У следчых органах Расіі заўчасную экстрадыцыю назвалі "памылкай".