Камісія па трансгендарным пераходзе ў Беларусі ўхваліла каля 45% заяў

11/06/2026 - 10:46

Ілюстратыўнае фота / pixabay.com

Пасяджэнне камісіі па трансгендарным пераходзе ў Рэспубліканскім навукова-практычным цэнтры псіхічнага здароўя адбылося 10 чэрвеня 2026 года. Гэта было першае пасяджэнне ў бягучым годзе. Пра гэта паведамляе беларуская арганізацыя TG House.

Паводле наяўнай інфармацыі, на камісію прыйшлі каля 35 трансгендарных асобаў [верагодна, адзін-два чалавекі не дайшлі да пасяджэння. — Еўрарадыё]. 29 чалавек звярнуліся па дазвол на змену дакументаў, яшчэ шэсць — па дазвол на медыцынскі пераход.

Усе шэсць трансгендарных асобаў атрымалі станоўчыя рашэнні. Сярод тых, хто звяртаўся па дазвол на змену дакументаў, камісія ўхваліла дзесяць заяў.

Для параўнання: на снежаньскім пасяджэнні камісіі ў 2025 годзе станоўчыя рашэнні атрымалі каля 44% удзельнікаў, а па пытанні змены дакументаў — каля 29% (8 з 28 чалавек).

Асаблівасці працы камісіі

Першая інфармацыя пра дату пасяджэння з’явілася 28 траўня — тады TG House назваў яе меркаванай. Пазней дата пацвердзілася.

Пры гэтым тэлефанаваць заяўнікам, чые дакументы павінны былі разглядацца на пасяджэнні, пачалі толькі 8 чэрвеня.

Раней, паводле даных TG House, сітуацыя заставалася нявызначанай. Сакратарка камісіі Аляксандра Кучынская знаходзілася ў службовай камандзіроўцы да 15 чэрвеня, а інфармацыі пра выклік заяўнікаў не было.

На той момант арганізацыя лічыла правядзенне пасяджэння ў чаканыя тэрміны малаверагодным.

Сярод навін — новая старшыня камісіі, якая ўдзельнічала ў пасяджэнні дыстанцыйна праз Zoom. Шэраг удзельнікаў паведамляў, што сумоўі праходзілі ў паскораным тэмпе: у асобных выпадках апытанне займала ўсяго некалькі хвілін.

Большасць трансгендарных асобаў адзначае, што пытанні камісіі былі даволі стандартнымі і датычыліся гендарнай ідэнтычнасці, гісторыі пераходу, сацыяльнай адаптацыі, адносін з блізкімі і далейшых планаў.

Некаторыя ўдзельнікі распавядалі, што члены камісіі задавалі пытанні вельмі хутка, перабівалі адзін аднаго, а на адказы давалася ўсяго некалькі секунд.

Паводле назіранняў, камісія працавала значна хутчэй, чым падчас папярэдніх пасяджэнняў. У асобных выпадках сумоўе займала толькі некалькі хвілін, пасля чаго амаль адразу запрашалі наступнага чалавека.

Гэта выклікала пытанні ў часткі трансгендарных асобаў, якія сумняваюцца, што за такі кароткі час камісія можа ўсебакова ацаніць абставіны кожнага асобнага выпадку.