Двух падлеткаў, пацярпелых ад атакі ў Бранскай вобласці, сёння выпішуць з бальніцы
Дзіцячы хірургічны цэнтр / БЕЛТА
Удзень 29 чэрвеня плануецца выпісаць двух падлеткаў, якія пацярпелі пры дронавай атацы ў Бранскай вобласці і праходзілі лячэнне ў РНПЦ дзіцячай хірургіі.
Як заяўляюць у Мінздароўя, стан дзяцей ацэньваецца як здавальняючы, іх накіруюць дадому ў Гомельскую вобласць.
У РНПЦ дзіцячай хірургіі працягне лячэнне толькі адзін пацярпелы падлетак.
Яшчэ двух дзяцей перавялі ў 6-ю гарадскую клініку Мінска, дзе яны працягваюць лячэнне. Адзначаецца, што хірургічныя аперацыі прайшлі паспяхова.
Стан дарослага пацыента ацэньваецца як стабільны, ён упэўнена ідзе на папраўку.
17 чэрвеня аўтобус з дзіцячай футбольнай камандай з Рэчыцы трапіў пад абстрэл дронаў у Бранскай вобласці Расіі. Пры гэтым траўмы атрымалі шэсць чалавек, загінула жанчына — жонка аднаго з трэнераў.
Расійскі бок вінаваціць у нападзе на аўтобус Украіну. Тым часам Генштаб УСУ заявіў, што ў названы час на тэрыторыі Бранскай вобласці не праводзіліся атакі з дапамогай дронаў.
