Фірма — вытворца вакцыны таксама расследуе гібель дзіцяці ў Ганцавіцкім раёне
У расследаванні гібелі двухмесяцнага хлопчыка ў Ганцавіцкім раёне прымуць удзел прадстаўнікі фармацэўтычнай кампаніі LG Chem. Ltd з Рэспублікі Карэя. Пра гэта агенцтву БЕЛТА паведамілі ў прэс-службе Міністэрства аховы здароўя.
Паўднёвакарэйская фірма ўжо выказала свае шкадаванні з нагоды гэтага інцыдэнту. "Мы гатовыя выканаць наш абавязак у найлепшай падтрымцы вашага расследавання", — гаворыцца ў афіцыйным лісце прадстаўнікоў кампаніі.
Як паведамлялася раней, здарэнне адбылося некалькі дзён таму. Хлопчыку рабілі планавую прышчэпку дзвюма вакцынамі — "Эўпента" і "Імвавакс Полія". Пасля прышчэпкі дзіцяці стала кепска. Медыкі не змаглі выратаваць яго. Ужыванне дзвюх серыяў гэтых вакцын у Беларусі прыпыненае да заканчэння расследавання.
У фірме-вытворцы адзначаюць, што кантроль якасці вакцыны праводзіўся ў лабараторыях Швейцарыі, Італіі ды Бельгіі пры супрацоўніцтве з СААЗ. Скаргаў ад іншых краін няма. Цяпер кампанія завяршае падрыхтоўку дакументаў для падачы на дзяржаўную рэгістрацыю ў Беларусі. LG аплаціла першапачатковую экспертызу дасье, а поўнае дасье будзе перакладзенае і адаптаванае да канца верасня.
Спецыялісты кампаніі Sanofi Pasteur (Францыя) паведамілі, што інфармацыя па вакцыне "Імавакс Полія" аналізуецца ў штаб-кватэры кампаніі. Вынікі перададуць у Беларусь у верасні.
Вакцына "Эўпента", якую выпускаюць у Паўднёвай Карэі, мае знак якасці сусветнага ўзроўню і рэкамендаваная для прымянення СААЗ. Яе закупляе Дзіцячы фонд ААН (ЮНІСЕФ). Вакцына выкарыстоўваецца ў 43 краінах. У Беларусі выкарыстана больш за 94 тысяч доз яе.
