ГУБАЗіК затрымаў экс-сілавіка, які хацеў ваяваць за Украіну
Супрацоўнікі ГУБАЗіКа затрымалі былога сілавіка. У праўладным тг-канале з'явілася "пакаяльнае" відэа з ім. "Медыязона" высветліла, што затрыманага завуць Алег Гайдук.
Сілавікі заяўляюць, што затрыманы "зліваў" звесткі былых калег у "экстрэмісцкія" тэлеграм-каналы і пакідаў там абразлівыя каментары пра кіраўніцтва Беларусі. Таксама паведамляецца, быццам мужчына зарэгістраваўся ў плане "Перамога" і хацеў паехаць ваяваць на баку Украіны.
У "пакаяльным" відэа Гайдук кажа, што прайшоў верыфікацыю ў плане "Перамога" і стэлефанаваўся з кіраўніком ByPol Аляксандрам Азаравым. Таксама ён кажа, што падаў заяўку на рэгістрацыю ў бот "Воіны святла", каб ваяваць "на баку нацыянальных батальёнаў Украіны". Акрамя таго затрыманы кажа, што перадаваў звесткі былых калег у "Чорную кнігу Беларусі".
