Макей — пра параненага дыпламата: Кулі не закранулі жыццёва важныя органы

Макей кажа, што стан дыпламата цяжкі, але ён нармалізуецца. "Чатыры кулі не закранулі жыццёва важныя органы, — адзначае міністр. — У абед лекары павінны пачаць яго вывад з рэанімацыйнага стану". Раней падобную заяву зрабіў кіраўнік МЗС Турцыі Меўлют Чавушоглу. Паводле яго слоў, стан параненага беларускага дыпламата задавальняючы і яго ў чацвер могуць перавесці ў агульнае аддзяленне бальніцы.

Што да версій здарэння, то называецца спрэчка на бытавой глебе ці ўвогуле нейкая выпадковасць, паколькі стралок мог знаходзіцца ў неадэкватным стане. Уладзімір Макей не бачыць ніякай палітыкі ў тым, што адбылося ў Анкары. Ён не выключае, што сусед быў незадаволены паводзінамі дзяцей, якія гулялі на падворку: "Магчыма на гэтай глебе і адбыўся ўсплёск эмоцый".