Брэсцкую крэпасць абараняюць ад баброў (фота)
Каб захаваць дрэвы ад нападаў грызуноў, на тэрыторыі мемарыялу іх абмотваюць калючым дротам.
Бабры, якія жывуць на беразе ракі Мухавец, пачалі нарыхтоўваць сабе корм на зіму. У выніку недалёка ад цэнтральнай выспы Брэсцкай крэпасці з'явіліся абгрызеныя вербы. Некаторыя з іх нават пападалі ў ваду.
У каментарыі газеце "Брестский курьер" эколагі паведамілі, што найлепшы варыянт захавання дрэваў у такой сітуацыі — абвязаць іх ствалы металічнай сеткай у некалькі слаёў. Аднак супрацоўнікі комплексу вырашылі змагацца з жывёламі па-свойму — пры дапамозе калючага дроту. Застаецца толькі здагадвацца, ці не раніць такая "абарона навакольнага асяроддзя" саміх баброў. А вось рэкамендаваная спецыялістамі сетка з'явілася толькі на адным дрэве.
