Кіркораў пра Скарыну: Вы мяне экзаменуеце? Да пабачэння!
Філіп Кіркораў атрымаў ордэн Скарыны. Адпаведны ўказ падпісаў Аляксандр Лукашэнка.
Як інфармуе БЕЛТА, расійскі спявак адзначаны за "значны ўнёсак у развіццё і ўмацаванне беларуска-расійскіх культурных сувязяў, высокае выканаўчае майстэрства".
"Комсомольская правда в Беларуси" пацікавілася ў Філіпа Кіркорава, ці ведае ён, хто такі Скарына. На гэта ён адказаў: "Вы што, мяне цяпер экзаменуеце? Да пабачэння!".
У Мінск спявак прыедзе ў панядзелак, у Палацы спорту ў яго запланаваны канцэрт.
Нагадаем, ордэн Скарыны быў заснаваны Вярхоўным Саветам Беларусі ў 1995 годзе. Яго прысуджаюць за значны ўнёсак у развіццё беларускай культуры, альбо за дабрачынную і гуманітарную дзейнасць. На сённяшні дзень былі ўганараваныя каля 160 чалавек, грамадзян Беларусі і замежнікаў.
У апошнія гады ордэн Скарыны ўжо атрымлівалі расійскія спевакі Надзея Бабкіна, Мікалай Баскаў, Юрый Антонаў.
Фота — bymedia.net, ctv.by
