Стала вядома, за што арыштавалі ў Францыі беларуса, падазраванага ў шпіянажы

Падставай для арышту беларуса ў Францыі стала відэа, якое ён даслаў сыну.

Пра арышт беларуса стала вядома 19 чэрвеня. Яго затрымалі каля завода па вытворчасці дронаў Delair каля Тулузы. У тым ліку, прадпрыемства вырабляе дроны для Украіны. Паведамлялася, што мужчыну абвінавацілі ў шпіянажы.

Падрабязнасці справы з затрыманнем 47‑гадовага беларуса, апісала выданне Le Monde. Наш суайчыннік фігуруе ў справе як М.А., заўважыла "Наша Ніва".

Мужчына расказаў, што 3 чэрвеня выпадкова апынуўся ў прамысловай зоне камуны Лабеж — ён шукаў аўтамайстэрню, каб адрамантаваць прабітую шыну. Беларус пабачыў выпрабаванні дронаў у палёце звонку тэрыторыі прадпрыемства. Ён быў так уражаны, што захацеў зняць іх на відэа, каб падзяліцца з сынам.

Менавіта гэты 55‑секундны ролік стаў галоўным доказам для следства. Беларус адправіў відэа на расійскі нумар тэлефона, які належыць сыну. Хлопцу 20 гадоў, ён навучаецца ў Расіі.

Тэхнікі завода Delair заўважылі, што мужчына здымае, і папрасілі яго сысці. Беларус, як ён кажа, спакойна падпарадкаваўся і не спрабаваў уцячы, бо не лічыў, што зрабіў нешта незаконнае. Нейкі час ён заставаўся ў сваім аўтамабілі непадалёк, а потым паехаў абедаць у рэстаран каля выхаду з прамысловай зоны, дзе яго і затрымалі.

У Францыі беларус зарабляў перапродажам аўто. У яго двое дзяцей — адно жыве ў Беларусі, другое вучыцца ў Расіі. Афіцыйна мужчына пражывае ў Іспаніі, але ўжо каля года пераязджае па розных краінах Еўропы. Зыходзячы з гэтага, следчыя мяркуюць, што ён мог аказваць падобныя "паслугі" і ў іншых дзяржавах ЕС.

Адвакат беларуса патрабуе дадатковых праверак.

Перад затрыманнем беларуса, 1 чэрвеня, некалькі чалавек кінулі ў будынак завода кактэйлі Молатава, якія не выбухнулі.