У “Фальварку Добрыя Мысьлі” зачынілі мастацкую галерэю
Такое рашэнне прынялі ўласнікі мінскай кавярні, пад дахам якой цягам дзесяці год зладзілі больш за 300 выставаў.
Са словаў куратаркі культурных праектаў у “Добрых Мысьлях" Таццяны Гаранскай, падзеі апошніх дзён прадказвалі такі фінал. 31 траўня з прычыны забароны там не ўдалося зладзіць прэзентацыю новай кнігі Ўладзіміра Мацкевіча “Не думайце пра рыжага і сляпога качканоса”. А 1 чэрвеня забаранілі адкрыццё пасмяротнай выставы Міхася Рагалевіча.
Сёння куратары забралі са сховаў твор розных мастакоў, кнігі і ўсе астатнія рэчы, якія сабраліся ў галерэі за дзесяць гадоў яе працы, паведамляе Радыё Свабода.
Апрача выставаў, у галерэі праводзіліся прэзентацыі новых кніг, адбываліся творчыя сустрэчы, літаратурныя фэсты.
