Зміцер Дашкевіч можа адзначыць народзіны ў карцары
Зняволены лідар “Маладога фронту” павінен быў выйсці з карцару Глыбоцкай калоніі 13 ліпеня, але яму “накінулі” яшчэ некалькі сутак ізаляцыі.
Пра гэта Радыё Свабода паведаміла нявеста Дашкевіча Наста Палажанка. Дзяўчына не выключае, што 20 ліпеня, калі Змітру споўніцца 31 год, ён будзе яшчэ ў карцары. Год таму ён таксама сустракаў народзіны ў ізаляцыі.
Зміцер Дашкевіч асуджаны на 2 гады. Тэрмін яго зняволення заканчваецца ў снежні, але стала вядома, што Следчы камітэт распачаў праверку адносна завядзення новай крымінальнай справы супраць палітвязня. У такім выпадку актывісту пагражае падаўжэнне тэрміну сама меней на год.
