Шэсце да памятнага знаку ахвярам палітычных рэпрэсій прайшло ў Магілёве
Хрэсны ход на месца расстрэлу ахвяр сталінскіх рэпрэсій у Магілёве / mogeparhia.by
У Магілёве 9 лютага адбылося шэсце да памятнага знаку ахвярам палітычных рэпрэсій. Акцыя была арганізаваная Магілёўскай праваслаўнай епархіяй.
Спярша архіепіскап Магілёўскі і Мсціслаўскі Сафроній здзейсніў літургію ў храме царскіх пакутнікаў і ўсіх навамучанікаў ХХ стагоддзя. Гэтая царква стаіць у парку Горкага ў цэнтры Магілёва.
А пасля літургіі частка вернікаў прайшла калонай з харугвамі праз паўгорада да кар'ера насупраць мясакамбіната. Гэтае месца, як пішуць праваабаронцы з MAYDAY, вядомае магілёўцам як месца масавых пахаванняў. Напрыканцы канцы 1980-х там выявілі чалавечыя парэшткі. Улады прызналі, што менавіта ў гэтым месцы адбываліся сталінскія расстрэлы.
Ад канца 1980-х там стаяў драўляны крыж. Штогода актывісты дэмакратычных партый і арганізацый ладзілі там мітынгі памяці. У кастрычніку 2023-га падчас рэканструкцыі праспекта Дзімітрава крыж памянялі на памятны знак з рускамоўным надпісам.
Менавіта на гэтае месца пасля набажэнства павёў калону іерэй Андрэй Шаварын. Міліцыя не перашкаджала акцыі. Праваслаўная япархія прызнала, што гэта быў хрэсны ход "на месца расстрэлу ахвяр рэпрэсій у 1930-я гады".
