Што пачытаць па-беларуску? Аб'яўлена "шорт" прэміі "Дэбют"
"Кнігарня", фота ілюстрацыйнае
Стаў вядомы шорт-ліст прэміі "Дэбют" імя Максіма Багдановіча. Яе штогод уручаюць за найлепшую дэбютную папяровую ці электронную кнігу, напісаную на беларускай мове ці перакладзеную на яе, аўтару або перакладчыку ва ўзросце да 35 гадоў на момант выдання кнігі.
Прымію даюць за творы ў жанрах, у якіх працаваў Максім Багдановіч: паэзія, проза, мастацкі пераклад.
Сёлета ў намінацыі прозы на прэмію будуць прэтэндаваць: "Самаізаляцыя" Канстанціна Касяка, "Чаму ўсё так? " Таццяны Карытка і "Новая зямля: Куканія" Антося Уласенка.
А дзякуючы дэбютантам-перакладчыкам цяпер па-беларуску можна прачытаць і старажытны эпас, і легендарны графічны раман пра жыццё дзяўчынкі ў Іране, і нават знакамітыя "Хронікі Нарніі".
На прэмію за найлепшы мастацкі пераклад намінуюцца: Алена Карп — за пераклад з французскай мовы "Персіполіса" Маржан Сатрапі, Яўген Папакуль — за пераклад са старажытнаісландскай мовы "Эды Сноры Стурлусана" і Андрэй Строцаў — за пераклад з англійскай мовы кнігі Клайва Стэйплза Льюіса "Хронікі Нарніі: Прынц Каспіян".
Прэмію "Дэбют" у галіне паэзіі за 2021-2022 гады вырашылі не ўручаць.
У склад журы прэміі ўвайшло пяцёра сябраў: літаратуразнаўца Ульяна Верына; пісьменніца Святлана Курс; паэт і перакладчык Уладзімір Лянкевіч; паэт, перакладчык, выкладчык літаратуры Андрэй Хадановіч; паэтка і перакладчыца Юлія Цімафеева.
Прэмію заснавалі ў 2010 годзе Беларускі ПЭН-цэнтр, Саюз беларускіх пісьменнікаў і Мясцовы дабрачынны фонд “Вяртанне”.
