Святлана Алексіевіч: “Я ў нейкім недарэчным становішчы…”

За два дні да абвяшчэння лаўрэата Нобелеўскай прэміі па літаратуры Еўрарадыё датэлефанавалася да Святланы Алексіевіч. Нобелеўскі камітэт не публікуе шорт-лістоў, але ў рэйтынгу букмекераў беларуская пісьменніца зараз ідзе чацвёртай. Яна апярэджвае, напрыклад, Умберта Эка і Яўгена Еўтушэнку.

Алексіевіч прызналася, што ўжо стамілася ад тэлефанаванняў з усяго свету. А каментаваць перспектывы атрымання “нобеля” адмовілася: “Я ў нейкім недарэчным становішчы… Як гэта я буду пра гэта казаць?”

Заўтра пісьменніца ляціць на кніжны кірмаш у Франкфурт, каб прэзентаваць там сваю апошнюю кнігу “Время секонд-хенд”. Без перабольшанняў, Франкфурцкі кірмаш — адна з цэнтральных падзеяў у літаратурным жыцці свету. Сёлета ён адкрываецца за дзень да таго, як стане вядомы ўладальнік Нобелеўскай прэміі па літаратуры.

Але нават калі Алексіевіч не дастанецца “нобеля”, яна не застанецца без прэміі. У апошні дзень Франкфурцкага кірмашу, 13 кастрычніка, ёй будзе ўручаная Прэмія міру Саюза нямецкіх гандляроў кнігамі. Цырымонія адбудзецца ў саборы Святога Паўла.

На Франкфурцкім кірмашы Святлана Алексіевіч будзе асаблівым госцем расійскага стэнда. Кніга “Время секонд-хенд” — апошні том у цыкле з пяці работ пісьменніцы пад агульнай назвай "Чырвоны чалавек. Галасы ўтопіі". У сярэдзіне верасня 2013 года яна адначасова выйшла ў Расіі, Швецыі і Германіі.

На здымку з архіву: Святлана Алексіевіч падчас міжнароднага кніжнага кірмашу ў Мінску, 2009 год. Фота — bymedia.net