Тэатр Беларускай Арміі застаўся без мастацкага кіраўніка
Марына Дударава / ctv.by
Драматычны тэатр Беларускай Арміі застаўся без мастацкага кіраўніка. Марына Дударава больш не займае гэтую пасаду, піша сайт "Зеркало" са спасылкай на ўласныя крыніцы. Згадка пра Дудараву знікла і са старонкі тэатра на сайце Мінабароны, з якім звязаны тэатр.
Дата звальнення Дударавай невядомая. Яшчэ пад канец верасня 2024-га яна займала сваю пасаду. Прычына звальнення таксама не паведамляецца. Магчыма, гэта звязана з выхадам на пенсію 62-гадовай рэжысёркі.
Звальненні ў беларускіх тэатрах ідуць шырокай хваляй з 2020 года. Як падлічыла сёлета ў кастрычніку Беларуская рада культуры, з 28 тэатраў, якія працуюць у Беларусі, толькі ў шасці за гэты час засталіся ранейшыя і дырэктары, і мастацкія кіраўнікі і/ці галоўныя рэжысёры (гэта значыць, усё кіраўніцтва засталося нязменным). Адным з іх быў тэатр Беларускай Арміі.
