У Аўстрыі падаў у адстаўку канцлер — другі за два месяцы

Аляксандр Шаленберг у чацвер падаў у адстаўку з пасады канцлера Аўстрыі пасля двух месяцаў працы, паведамляе найбуйнейшае аўстрыйскае выданне Kronen Zeitung. Папярэдні кіраўнік урада, Себасцьян Курц, склаў паўнамоцтвы на фоне карупцыйнага скандалу 9 кастрычніка.

Хоць Шаленберг ужо напісаў заяву аб звальненні, ён дачакаецца таго, каб унутры партыі былі зроблены адпаведныя прызначэнні, паведамляе выданне.

Новым канцлерам краіны, па дадзеных Kronen Zeitung, стане міністр унутраных спраў Карл Нехамер. Прызначэнне можа адбыцца ў пятніцу, 3 снежня.