З'явіўся рэсурс, які шукае аўдыё-кнігі на беларускай мове
Скрын з сайта audiobooks.by
З'явіўся ресурс audiobooks.by — гэта сайт-навігатар, які шукае аўдыё-кнігі на беларускай мове.
"Сайт не ўтрымлівае самі кнігі, а дае спасылкі на пляцоўкі, дзе іх можна паслухаць ці купіць", — тлумачаць стваральнікі рэсурсу. Па іх словах, праз сайт можна хутка выйсці на аўдыёкніжкі сучасных аўтараў, а гэтак жа на класічныя і дзіцячыя творы ў аўдыё-фармаце. На гэты момант сайт мае спасылкі на 340 твораў літаратуры, якія ёсць у бібліятэках "Беларускай палічкі", "Камуніката" і г.д.
Ідэя стварэння сайта-навігатара прыйшла пасля таго, як яго аўтары ўдзельнічалі у запісе кніг беларускіх сучасных аўтараў.
"Але кнігу запісаць запісалі, а дзе пра яе напісаць, каб беларусы даведаліся?" — задаліся пытаннем стваральнікі "навігатара". У выніку з'явіўся спецыяльны ТГ-канал, які таксама патрабаваў удасканалення, паколькі выявілася яшчэ адна праблема:
"Калі навіны ёсць дзе посціць, няма месца, дзе можна паглядзець "што ўжо запісана". Скроліць пасты не вельмі зручна. Таму мы і вырашылі стварыць адмысловы сайт", — тлумачаць яго стваральнікі ў Тэлеграме.
Дзякуючы сайту, беларусы могуць хутка знайсці аўдыё-раман "1984" Джорджа Оруэла ці вершы Алеся Разанава.
