У Магілёве пройдуць “Зялёныя святкі”
Такую імпрэзу 29 чэрвеня ладзіць Студэнцкае этнаграфічнае таварыства сумесна з Магілёўскім гарвыканкамам і кампаніяй “Будзьма беларусамі!”.
Месцам правядзення свята стане этнаграфічны комплекс народных промыслаў у Зялёным Гаі (мікрараён “Спадарожнік”).
“Зялёныя святкі” — характэрная для Магілёўшчыны назва траецкіх святаў. У даўніну прынята было ўшаноўваць зеляніну, дрэвы, кветкі, што знаходзяцца ў сваім росквіце. Менавіта яны стануць прыродным атачэннем свята, вызначаючы яго вобразнасць і змест. Для аздаблення тэрыторыі фэста плануецца выкарыстанне аб’ектаў лэнд-арт.
На святочных пляцоўках можна будзе паўдзельнічаць у старадаўніх траецкіх абрадах, пагуляць у гульні, патаньчыць і паслухаць абрадавыя лірычныя спевы ў выкананні фальклорных гуртоў. Будзе працаваць кірмаш рамёстваў. У канцэртнай праграме выступяць гурты Горынь, Dainava, Guda, Кудмень, Рада і інш.
