У Мінску правераць падвесныя столі ў гандлёва-забаўляльных цэнтрах

Удзень 12 лістапада ў холе 1-га паверху будынка з вышыні 5,5 метра часткова абрынулася падвесная гіпсакардонная столь (спачатку гаворка ішла пра 150 квадратных метраў, цяпер — пра 190). Пацярпела 24-гадовая дзяўчына, прадавец кветкавай крамы, якая цяпер знаходзіцца на амбулаторным лячэнні. Праваахоўнікі высвятляюць прычыны здарэння ў "Арэна Сіці", пабудаванай пяць гадоў таму. Распачатая крымінальная справа.

Агляды гандлёва-забаўляльных цэнтраў, а таксама "дадатковыя мерапрыемствы па забеспячэнні бяспекі (пры неабходнасці)", мусяць адбыцца да канца лістапада. Менавіта тады кіраўніцтва Мінгарвыканкама будзе чакаць інфармацыю ад кіраўнікоў раённых адміністрацый.

У будынку "Арэна Сіці" на сённяшні дзень працуе толькі супермаркет на першым паверсе.