У Вільні з’явіцца помнік Барбары Радзівіл і Жыгімонту Аўгусту
Праект помніка Барбары Радзівіл і Жыгімонту Аўгусту / www.facebook.com/VrublevskiuBiblioteka
У Вільні з’явіцца помнік Барбары Радзівіл і Жыгімонту Аўгусту. Іх гісторыю кахання скульптар Гедымінас Пяркунас убачыў вельмі своеасабліва: на пастаменце — два залатыя чарапы, паболей і паменей.
— Здаецца, ён трансфармуе Шэкспіраўскі міф пра Рамэа і Джульету, нагадваючы лёс Барбары і Жыгімонта, каханне, смерць і жыццё паміж імі. Твор... правакуе, задае шмат пытанняў, таму, не сумняюся, выкліча цікаўнасць і заінтрыгуе як віленчукоў, так і гасцей сталіцы, — мяркуе ўдзельнік экспертна-спецыялісцкай камісіі, журналіст Валдас Пуцейкіс.
Помнік паставяць у дворыку бібліятэкі Урублеўскіх Акадэміі навук Літвы.
Барбара Радзівіл — каралева польская і вялікая княгіня літоўская, другая жонка Жыгімонта II Аўгуста. Яна памерла ўсяго ў 30 гадоў, праз паўгода пасля каранацыі. Ёсць меркаванне, што жанчыну атруцілі, бо шмат хто выступаў супраць узмацнення Радзівілаў, якім саюз Барбары і Жыгімонта адкрываў бясконцыя магчымасці для ўплыву.
У парку побач з Нясвіжскім палацам быццам бы жыве прывід Барбары Радзівіл — Чорная панна Нясвіжу.
