Вялізны лясны пажар пад Бялынічамі тушылі больш за 130 леснікоў
Лясны пажар / pexels.com, ілюстрацыйнае фота
Вялізны лясны пажар здарыўся ў ноч на 30 жніўня ў Бялыніцкім лясгасе, паведамляе прэс-служба Міністэрства лясной гаспадаркі.
З агнум змагаліся больш за 130 леснікоў. Прычым на дапамогу бялыніцкім калегам прыйшлі леснікі з Бярэзінскага і Крупскага лясгасаў Міншчыны.
Бярэзінскі лясгас накіраваў на тушэнне пажару 40 чалавек, чатыры пажарныя аўтамабілі, тры трактары з бочкамі, шэсць легкавых аўтамабіляў і нават усюдыход. У дапамогу ад Крупскага лясгасу таксама прыбылі 40 чалавек, тры пажарныя аўтамабілі і два трактары з плугамі.
Пажар захапіў плошчу ў 3 гектары ў Бялыніцкім лясгасе, а потым яшчэ 1,5 гектара лесу згарэла ў Крупскім.
Крупскія леснікі разам з бярэзінскімі патушылі агонь у сябе і накіраваліся на дапамогу бялыніцкім калегам. І да месца ачага ў Бялыніцкім лясгасе яны дабраліся нашмат хутчэй, чым магілёўцы.
У Бялыніцкім лясгасе тушэннем ляснога пажару займаліся 50 чалавек, два пажарныя аўтамабілі, адзін трактар з бочкай, дзевяць легкавых аўтамабіляў і ўсюдыход.
