Аналітыкі: Інфляцыя ў Беларусі можа перавысіць афіцыйны прагноз у 2 разы
Такая ацэнка на 2014 год прыводзіцца ў "Макраманіторы СНД", падрыхтаваным аналітычным упраўленнем Еўрапейскага банка развіцця.
У ім адзначаецца, што да такой высновы падштурхоўваюць месячныя тэмпы росту індэкса спажывецкіх коштаў, якія назіраліся ў першыя месяцы года. І калі Нацбанк захавае грашовую палітыку ў цяперашнім стане, "існуе пагроза прыблізна двухразовага перавышэння інфляцыяй мэтавага значэння".
БелаПАН нагадвае, што спажывецкія цэны ў красавіку выраслі ў Беларусі на 1,6%. За студзень-красавік інфляцыя склала 6,6%. Між тым афіцыйны прагноз уладаў нашай краіны на бягучы год прадугледжвае зніжэнне інфляцыі да 11% у параўнанні з мінулым годам (у 2013-м спажывецкія цэны ў Беларусі выраслі на 16,5%).
Між тым кіраўніцтва Нацыянальнага банка ў красавіку ўжо заяўляла, што прагнозны параметр па інфляцыі ў бягучым годзе наўрад ці будзе выкананы. Згодна з красавіцкай ацэнкай Нацбанка, інфляцыя ў бягучым годзе ў Беларусі можа скласці 16-17%.
Разам з тым, нягледзячы на больш высокія тэмпы інфляцыі ў параўнанні з афіцыйным прагнозам, Нацбанк у красавіку гэтага года знізіў стаўку рэфінансавання з 23,5% да 22,5%. На думку экспертаў, на гэты крок грашовыя ўлады пайшлі пад ціскам ўрада, які настойвае на змяншэнні кошту крэдытных рэсурсаў для прадпрыемстваў.
Фота — Fotolia
