Беларусь і Расія абмяркоўваюць роўмінг. Ізноў
Тэлефон / pixabay.com
Беларусь і Расія вядуць перамовы аб інтэрнэт-трафіку ў роўмінгу, піша Tochka.by.
"Прыблізныя тэрміны завяршэння работ — да канца года", — сказаў дзяржсакратар Саюзнай дзяржавы (СД) Дзмітрый Мезенцаў.
Дакладнай даты поўнай адмены роўмінгу паміж дзвюма краінамі ён не назваў.
Над адменай роўмінгу Беларусь і Расія працуюць з 2017 года. Планавалася, што адмена роўмінгу адбудзецца 1 верасня 2020-га — пра гэта ў снежні 2019 года нават падпісалі спецыяльную "дарожную карту". Але ў выніку толькі 1 лістапада плата за роўмінг была зніжаная ў 20 разоў — з 30 цэнтаў да 1,5 цэнта ў хвіліну.
У пачатку 2021 года Мезенцаў абяцаў, што "да канца года" роўмінг цалкам адменяць. А беларускі амбасадар у Маскве казаў, што зробяць гэта 1 студзеня 2022-га.
Потым давалі яшчэ некалькі абяцанняў, калі роўмінг "ужо дакладна" будзе адменены. Але гэтага так і не здарылася.
Большасць карыстальнікаў ужо перайшлі на званкі анлайн, таму адмена платы за тэлефонныя званкі ў роўмінгу для іх не асабліва актуальная. Цяпер бакі пачалі абмяркоўваць плату за інтэрнэт-трафік у роўмінгу.
