Брамніка БАТЭ Верамко дыскваліфікавалі на пяць матчаў

Дысцыплінарны камітэт пастанавіў дыскваліфікаваць брамніка ФК БАТЭ Сяргея Верамко на пяць матчаў. Акрамя таго, ён аштрафаваны на 1150 рублёў (50 базавых велічыняў). Такое рашэнне было прынятае 7 жніўня на пасяджэнні дысцыплінарнага камітэта, інфармуе афіцыйны сайт Беларускай федэрацыі футбола.

Верамко пакаралі за інцыдэнт на выязным матчы 17-га тура чэмпіянату Беларусі, калі БАТЭ сустракаўся з "Мінскам". У сустрэчы барысаўчане прайгралі з лікам 0:1, у выніку чаго апусціліся на трэцяе месца ў турнірнай табліцы.

Пад канец гульні Верамко прыбег амаль да штрафной плошчы гаспадароў, дзе на траве ляжаў футбаліст "Мінска", а арбітр выклікаў на поле медыкаў. Брамнік БАТЭ прыспешваў сапернікаў хутчэй аднавіць гульню. Тое ж ён патрабаваў у суддзі Віталя Севасцяніка, прычым перад тварам рэферы ён махаў рукамі. Той паказаў галкіперу жоўтую картку.

Верамко, аднак, не супакоіўся і працягваў гучна абурацца судзействам нават пасля фінальнага свістка. За гэта ён атрымаз другую жоўтую, а потым і чырвоную картку.

У сваім рапарце Севасцянік адзначыў, што выдаліў футбаліста за пагрозу фізічнай расправы з суддзёй матчу.