Брэсцкія чыноўнікі захаваюць беларускую мову ў Гошчаўскай школе

У школе вёскі Гошчава Івацэвіцкага раёна захаваюць беларускую мову навучання. Такі адказ на грамадскую петыцыю далі чыноўнікі з упраўлення адукацыі Брэсцкага аблвыканкама. Раней жыхарка вёскі Юлія Папко, якая сама па адукацыі беларускі філолаг, пачала збіраць подпісы бацькоў за перавод школы на рускую мову навучання. З гэтай нагоды на сайце petitions.by стварылі петыцыю з патрабаваннем захаваць беларускую мову. Пад зваротам паставілі 72 подпісы. Дакумент даслалі ў Міністэрства адукацыі, перадае Радыё Свабода.

Чыноўнікі адказалі, што аддзел адукацыі, спорту і турызму Івацэвіцкага райвыканкама не прасіў пераводзіць школу на рускую мову і прасіць не збіраецца. Таксама адзначана, што адміністрацыя і большасць настаўнікаў школы выступаюць супраць пераводу навучання на рускую мову, а большасць бацькоў жадае пакінуць школу беларускай.

Ва ўпраўленні адукацыі спасылаюцца на статут школы, паводле якога мова навучання — беларуская, нязменна, ад моманту заснавання ў 1965 годзе.