“Бяспеку не гарантуе ні адзін перавозчык”. Як цяпер беларусаў возяць на поўдзень Расіі

06/07/2026 - 17:05

Як цяпер выглядаюць маршруты ў Анапу / euroradio.fm

Большасць беларускіх тураператараў адмянілі пуцёўкі ў Крым, але працягваюць вазіць турыстаў у блізкія да паўвострава Анапу і Геленджык. Як высветлілася, аб’язнымі маршрутамі.

Нагадаем, што пасля другога інцыдэнту з атакай на беларускі турыстычны аўтобус у Бранскай вобласці 2 ліпеня дзяржаўны сакратар Савета бяспекі Беларусі Аляксандр Вальфовіч заклікаў беларусаў устрымацца ад паездак у Расію, асабліва ў прыгранічныя рэгіёны.

“Мы ж папярэджвалі. Прэзідэнт неаднаразова выступаў і казаў: паважаныя беларусы, устрымайцеся ад паездак сёння ў Расію, асабліва ў прыгранічныя вобласці. Там кожны дзень падаюць беспілотнікі, адбываюцца такія непрыемныя выпадкі. Мы не закрывалі межы, гэта рашэнне кожнага — ехаць ці не ехаць.

[...] Гэта абсалютна прыватныя паездкі асобных грамадзян нашай Беларусі, якія вырашылі паехаць у Анапу на Чорнае мора. Задума добрая, выдатная, але падчас такой паездкі яны, безумоўна, падвяргаюць сябе вялікай небяспецы. І гарантаваць такую бяспеку сёння не зможа ніводная аўтобусная экскурсійная фірма”, — заявіў Вальфовіч.

Даўжэй не праз аб’езд, а праз чэргі на мяжы

Падобную фразу Еўрарадыё пачула падчас размовы з аператарам адной з гомельскіх турфірмаў. Мы патэлефанавалі туды пад выглядам грамадзян, якія цікавяцца маршрутам аўтобуснага туру на расійскае ўзбярэжжа Чорнага мора.

“Бяспеку вам не гарантуе ні адзін перавозчык”, — сказалі там.

Гэтая фірма возіць адпачывальнікаў у Кабардзінку, Геленджык і на Азоўскае мора. Аб’езд дадае каля 250 кіламетраў у адзін бок, аднак на кошт паездкі гэта не ўплывае.

У іншай гомельскай фірме ўдакладнілі, што тур у Геленджык (у Анапу яны не ездзяць) будзе праходзіць па маршруце: Гомель — Раслаўль (Смаленская вобласць) — Калуга — Тула — Геленджык.

У трэцяй кампаніі ўвогуле паведамілі, што турыстам трэба за свой кошт дабрацца да Мінска або Магілёва, а ўжо адтуль ехаць у Анапу — “дзеля вашай бяспекі”.

“Раней ездзілі, але літаральна нядаўна адмянілі рэйс”, — паведамілі ў гэтай фірме.

Патэлефанавалі мы і ў Віцебск. Там таксама расказалі, што цяпер туры ідуць аб’язным маршрутам. Дарога стала даўжэйшай прыкладна на паўтары гадзіны (таксама праз Тулу), але, паводле супрацоўнікаў кампаніі, “гэта амаль не адчуваецца” і на кошт паездкі не ўплывае.

Тое ж самае распавядаюць і ў мінскіх турфірмах. У адной з кампаній адзначылі, што імкнуцца перасаджваць турыстаў на цягнік да Анапы.

— Ён крыху даражэйшы, затое ехаць больш камфортна і бяспечна.
— А наколькі даражэй (на траіх чалавек)?
— [...] На 170 долараў даражэй з чалавека.
— А калі аўтобусам, то ён таксама едзе праз Бранск?
— Не, цяпер мы аб’язджаем Бранск, пакуль такая сітуацыя ў сувязі з апошнімі навінамі.

Рэйсы адпраўляюцца рэгулярна. Дарога павялічваецца літаральна на некалькі гадзін.

Яшчэ ў адной мінскай турфірме таксама прапануюць туры ў Анапу, якія ідуць праз Магілёў, Калугу і Тулу. Там паведамілі, што цяпер паездка займае больш часу не столькі праз аб’езд, колькі праз чэргі на мяжы. Часам даводзіцца чакаць да чатырох гадзін.

“Беражыце сябе”

Нагадаем, што пасля другога інцыдэнту з атакай на беларускі аўтобус у Бранскай вобласці лідарка дэмакратычных сіл Святлана Ціханоўская заклікала беларусаў не ездзіць у Расію.

“Хтосьці зарабляе на такіх турах, нібыта там бяспечна, — але гэта не так. А так званым уладам, здаецца, усё адно, колькі яшчэ пацерпіць беларусаў. Беражыце сябе”, — адзначыла Ціханоўская 2 ліпеня.

Аляксандр Лукашэнка выказаўся толькі пасля першага інцыдэнту, які адбыўся 17 чэрвеня з удзелам аўтобуса, у якім дзіцячая футбольная каманда з Рэчыцы ехала ў Геленджык. Тады ён заклікаў забараніць паездкі дзяцей за мяжу “без дзяржаўнага нагляду і дазволу”.

“Я не хачу тут нікога асуджаць, але папрасіць нашых людзей, і асабліва бацькоў, калі гаворка ідзе пра дзяцей: трэба перасядзець гэты час дома. Трэба займацца футболам і іншымі мерапрыемствамі тут. Тут больш камфортна, у ціхай і спакойнай краіне”, — заявіў Лукашэнка.