Да палітзняволенай Паліны Шарэнда-Панасюк не пусцілі адваката

Да палітзняволенай Паліны Шарэнда-Панасюк не пусцілі адваката. Пра гэта "Белсату" расказаў яе муж Андрэй Шарэнда.

"Адвакат Паліны адмыслова прыехаў з Брэста ў калонію ў Гомельскую вобласць, каб сустрэцца з ёй, але атрымаў адмову. Быццам бы Паліна мусіла напісаць заяву, што хоча сустрэцца з адвакатам, і гэта стандартная адгаворка. Паліна адказна падыходзіць да такіх момантаў, і ўсе заявы напісаныя загадзя", — кажа Андрэй.

Звестак пра палітзняволеную няма ўжо месяц. Па словах мужа, на Новы год Паліну змясцілі ў ШІЗА, а час перабывання там не залічваецца ў час знаходжання ў ПКТ. "Фактычна, Паліна можа знаходзіцца ў памяшканні камернага тыпу значна болей, чым тыя паўгода, што ёй выпісалі", — падкрэслівае Андрэй Шарэнда.

Паліна Шарэнда асуджаная на два гады зняволення паводле трох артыкулаў Крымінальнага кодэкса. Падчас зняволення ёй дадалі яшчэ адзін год да асноўнага тэрміну. Цяпер Паліна Шарэнда-Панасюк знаходзіцца ў жаночай папраўчай калоніі № 24 (Зарэчча).

Яе муж і два малыя сыны з'ехалі ў Польшчу.