Калеснікава правяла перамовы з дыпламатам ЗША, які ўдзельнічае ў вызваленні палітвязняў
Намеснік памочніка дзяржсакратара ЗША Крыс Сміт (у цэнтры) з Марыяй Калеснікавай, Таццянай Хоміч і Антонам Раднянковым / прэс-служба Марыі Калеснікавай
Марыя Калеснікава, якая знаходзіцца ў ЗША, сустрэлася з намеснікам памочніка дзяржсакратара па справах Усходняй Еўропы Крысам Смітам. Гэта адзін з ключавых амерыканскіх дыпламатаў, задзейнічаных у перамовах з афіцыйным Мінскам пра вызваленне палітвязняў.
Іх сустрэча адбылася 29 чэрвеня. На ёй таксама прысутнічалі сястра Калеснікавай Таццяна Хоміч і сябра яе каманды Антон Раднянкоў. У каментары "Зеркалу" Калеснікава адзначыла, што пры ўдзеле Крыса Сміта быў запушчаны дыялог з уладамі Беларусі, а сам ён "неаднаразова ездзіў у Мінск і стаяў ля вытокаў працэсу, які працягваецца сёння".
Журналісты спыталіся, ці абмяркоўваўся на сустрэчы наступны візіт у Мінск спецпрадстаўніка ЗША па Беларусі Джона Коўла для перамоваў пра вызваленне палітвязняў.
"Гарызонт такога візіту праглядаецца, але гэта няпросты працэс", — адказала Калеснікава.
За апошні год з дапамогай ЗША з-за кратаў былі выпушчаныя больш за 500 беларускіх палітвязняў.
