— Пакуль гэта ўдалося толькі часткова: па краі антыцыклону ўжо пачынае паступаць больш прахалоднае паветра. Уплыў Атлантыкі тут усё ж вельмі моцны, таму па краях гэтага “гарачага ядра” ўжо фарміруюцца моцныя дажджы.
Падобныя еўрапейскія хвалі спёкі раней сустракаліся значна радзей, але змяненне клімату робіць іх усё больш частымі. Да таго ж гэты антыцыклон не проста стварае бясхмарнае надвор’е, а літаральна зацягвае гарачыя паветраныя масы з Паўночнай Афрыкі. Сваю ролю адыгрывае і хуткае праграванне Арктыкі, што спрыяе ўтрыманню спёкі на працяглы перыяд — большы за тыдзень.
Лета працягваецца. Калі пахаладанне?
Кліматолаг кажа, што пікавая спёка захаваецца яшчэ два-тры дні. Потым наступіць невялікае пахаладанне, усяго на пару градусаў, то-бок дзённая тэмпература ўсё роўна будзе на ўзроўні 30–32 градусаў.
— Хутчэй за ўсё, ліпень і жнівень будуць вельмі зменлівымі, — кажа Уладзіслаў Шумак. — Перыяды з тэмпературай каля 20 градусаў будуць змяняцца новымі хвалямі спёкі. Хаця атмасфера ўжо моцна перагрэлася, верагодна, да цяперашніх 40 градусаў тэмпература зноў не будзе даходзіць.
Якія агульныя прагнозы для ўсяго рэгіёна Усходняй Еўропы?
Па словах Уладзіслава Шумака, большасць глабальных мадэляў паказвае, што ліпень і жнівень ва Усходняй Еўропе будуць цяплейшымі за кліматычную норму. Але гэта не азначае бесперапынную спёку, а толькі сведчыць пра павышаную верагоднасць паўтаральных гарачых перыядаў.
Найбольш верагодны сцэнар такі: часовае пахаладанне на некалькі дзён (да 25–30 градусаў), а потым вяртанне летняй спёкі. Пры гэтым самі хвалі спёкі могуць быць дастаткова працяглымі — да паўтара тыдня.
— Праблема ў тым, што ўжо адбываецца высыханне глебы, — папярэджвае суразмоўца Еўрарадыё. — Сухая глеба спрыяе перагрэву паветра, назапашванню вільгаці ў атмасферы і ўзмацненню тэмпературных кантрастаў. Гэта, у сваю чаргу, можа прыводзіць да моцных шквалаў, ураганнага ветру і магутных ліўняў трапічнага характару.
Гэта можа адбыцца нават у бліжэйшыя дні. У Германіі ўжо назіраліся падобныя выпадкі. Менавіта пагранічная зона паміж гарачай паветранай масай і атлантычным паветрам становіцца прычынай такіх небяспечных з’яў. Гэта характэрна і для Беларусі, перадусім для большай часткі тэрыторыі краіны.
