"Дынамалёт" не даляцеў да Калінінграда праз тое, што ў кабіне трэснула шкло
"Дынамалёт" / Belavia
"Дынамалёт" авіякампаніі "Белавія" вярнуўся ў аэрапорт вылету праз шкло ў кабіне пілотаў. У Embraer E195LR (EW-400PO), нядаўна афарбаванага ў колеры хакейнага клуба "Дынама-Мінск", падчас палёту з Мінска (MSQ) у Калінінград (KGD) трэснула шкло з боку камандзіра паветранага судна. Пра гэта піша тг-канал "Авіятаршчына".
Інцыдэнт адбыўся ўдзень 24 лістапада на вышыні крыху больш за 9 тысяч метраў. Экіпаж прыняў рашэнне знізіць вышыню да 6100 метраў і вярнуцца ў Нацыянальны аэрапорт "Мінск".
Пасажырам у якасці падменнага борта быў прапанаваны Embraer E195LR (EW-513PO).
Беларуская супольнасць "Ад вінта" заўважае, што ў чэрвені гэтага года ўжо быў падобны выпадак з іншым брэндаваным самалётам Belavia. Для замены шкла борт адхіляюць ад палётаў. Звычайна гэты працэс займае 6-7 гадзін, 5 з якіх сыходзіць на зацвярдзенне спецыяльнага клею.
