Дзе патусіць на выхадных 21-23 сакавіка, раіць Леанід Купрыда

Рэдактар КВЗ, сцэнарыст і вядучы беларускай версіі праграмы “Брэйн-рынг” Леанід Купрыда амаль увесь час у раз’ездах. Тым не менш, праца на тэлебачанні ды ў кіно літаральна прымушае быць частым госцем абсалютна розных мерапрыемстваў. Але тусоўшчыкам Леанід сябе не адчувае і хацеў бы наведваць культурныя імпрэзы яшчэ часцей.

Што ж тычыцца выхадных 21-23 сакавіка, то на думку Леаніда Купрыды, выдатны адпачынак з дзецьмі атрымаецца на пастаноўцы “Драліён” Цырка дзю Салей. Праходзіць яна будзе тры дні запар у Мінск-Арэне, а адпаведна, можна выбіраць дзень, які больш пасуе. Але пачынаць выходныя КВЗ-шнік прапануе канцэртам Браяна Мэя і Кэры Эліс, які пройдзе 21 сакавіка ў Палацы Рэспублікі:

“Браяна Мэя пазіцыянуюць, як аднаго з найвялікшых гітарыстаў усіх часоў, можа, гэта і спрэчна, але тое, што ён легенда — факт. А вось пра Кэры Эліс у нас, напэўна, увогуле амаль не ведаюць, а яна лічыцца галоўнай зоркай амерыканскіх тэатральных мюзіклаў. Плюс, усё гэта будзе ў акустыцы, і яны скалупнуць старыя тэмы Queen. Думаю, будзе вельмі цікава. А ў нядзелю будзе выступаць шведскі гурт Dead by April. Я проста люблю ўсё, што пацяжэй. Напрыклад, мне вельмі сімпатычныя Metallica, Linkin Park, Black Sabbath… Тамму мне цікава будзе паглядзець і на гэты гурт”.

Праўда, не факт, што сам Леанід пойдзе на канцэрт Браяна Мэя. Гітарыста Queen з лёгкасцю можа перамагчы рок-опера Аляксея Рыбнікава “Юнона і Авось”, якую сцэнарыст лічыць геніяльнай. А сумясціць дзве імпрэзы, на жаль, не атрымаецца, бо Акадэмічны музычны тэатр ставіць яе таксама ў пятніцу ў 19:00.

“У нас была кампанія, з якой мы проста ставілі пласцінку “Юнона і Авось”, выключалі святло і слухалі оперу, лежачы на падлозе ў поўнай цемры, — узгадвае Леанід. — Калі я служыў у войску, то глядзеў яе па тэлевізары, папярэдне паставіўшы ахову, каб нас не злавілі. Праўда, быў крыху расчараваны, бо пастаноўка была ўжо з Мікалаем Карачанцавым, а я прызвычаіўся да тых, хто выконваў ролі на пласцінцы. Але не застаўся абыякавым. Таму з задавальненнем паглядзеў бы і гэту версію”.

У тэатры сцэнарыст ходзіць не так часта, як хацелася б, хоць, пастаянная праца з акцёрамі ды і жонка актрыса як мага лепей спрыяюць на тэатральнаму жыццю. Леанід прызнаецца, што як бацька траіх дзяцей, раней часта наведваў Тэатр ляляк, ТЮГ… Але цяпер старэйшыя дзеці выраслі, і гэтыя пастаноўкі іх не прывабліваюць. Тым не менш, знакаміты вядучы параіў бы звадзіць дзяцей на “Ката ў ботах” у Тэатры лялек, ці ў Акадэмічны музычны тэатр на “Лампу Аладына”.

“Ну, і нельга адмаўляцца ад класічнай “Яўген Анегін” у тэатры Оперы і балета! Зноў жа, можна схадзіць у Рускі дзіцячы тэатр на “Незвычайную казку Шахразады”. У нядзелю я б усё ж аддаў перавагу канцэрту Dead by April, але, калі мы кажам пра тэатры, паспрабаваў бы выбраць “Шчаўкунок” ці “Сільва” ў Акадэмічным музычным тэатры, ці ў Сучасным мастацкім — “Амерыканскую камедыю”. Спадзяюся, не пашкадуеце”.

А вось сітуацыю з выставамі Леанід Купрыда ахарактарызаваў, як “напружаную”. Маўляў, амаль усе яны аднапланавыя і аднатыпныя. Адзінае, што зацікавіла КВЗ-шніка — выстава ў замкавым комплексе “Мір”, якая называецца “Дух часу і раскошы. Мода і стыль”. “Прыцягвае менавіта незбітасць падыходу”, — тлумачыць сцэнарыст.

“Я не вельмі люблю ўсё тое, што звязана з папсой, я не наведваю падобныя мерапрыемствы, — Леанід шукае ў афішы мерапрыемства, якое нават ворагу не параіць. — Для мяне гэтая музыка вельмі прымітыўная, нецікавая і незразумелая. Але кагосьці яна бударажыць, разганяе кроў. Я выдатна разумею, што тое, што не падабаецца мне, можа падабацца каму-небудзь іншаму, а таму маё выказванне можа закрануць іх інтарэсы. Карацей, я лепш устрымаюся ад каментарыяў”.

Выдатных вам выхадных!

Фота: amik.ru