Euro'2016: расклад матчаў футбольнай зборнай Беларусі

23 лютага ў французскай Ніцы прайшло лёсаванне адборачнага турніру футбольнага чэмпіянату Еўропы 2016 года. У адной групе са зборнай Беларусі (у групе С) згуляюць каманды Іспаніі, Украіны, Славакіі, Македоніі і Люксембурга.

Як вядома, іспанцы — найлепшыя ў свеце, і ўжо цяпер ім аддаюць першае месца па выніках турніра ў групе. А вось за другое месца, якое дае права згуляць на Euro'2016 у Францыі, беларусы могуць і павінны змагацца, асноўныя сапернікі — ўкраінцы і македонцы. Шанец згуляць на кантынентальным турніры мае і найлепшая каманда з ліку тых, што зоймуць трэція месцы. Астатнія зборныя, якія фінішуюць трэцімі, згуляюць у спарынгавых матчах.

Расклад матчаў беларускай зборнай выглядае наступным чынам:

2014 год

8 верасня. Люксембург — Беларусь

9 кастрычніка. Беларусь — Украіна

12 кастрычніка. Беларусь — Славакія

15 лістапада. Іспанія — Беларусь
 

2015 год

27 сакавіка. Македонія — Беларусь

14 чэрвеня. Беларусь — Іспанія

5 верасня. Украіна — Беларусь

8 верасня. Беларусь — Люксембург

9 кастрычніка. Славакія — Беларусь

12 кастрычніка. Беларусь — Македонія
 

"Магло быць лепш, магло — горш, — цытуе словы галоўнага трэнера беларускай зборнай Георгія Кандрацьева сайт bff.by. — Як ёсць, так ёсць. Нічога не застаецца, як змагацца ў кожным матчы. Тады ўсё будзе нармальна. Нельга сказаць, што нам пашанцавала ці, наадварот, не пашанцавала. Іспанія — відавочны фаварыт. Наогул я не хацеў сустрэчы з тымі ж камандамі, што ў мінулым адборачным цыкле. Але ніколькі не засмучаны тым, што зноў выпала Іспанія.

Украіна — вельмі моцная, добрая каманда. Славакію і Македонію не магу назваць "темными лошадками". А Люксембург... Так, раней мы няўдала гулялі з ім. Але не магу сказаць, што гэта насцярожвае. Трэба з павагай ставіцца да ўсіх сапернікаў, выходзіць на кожны матч, як на апошні бой. Тады не будзе такіх асечак, якія здараліся ў мінулым. У кожнай гульні трэба выкладвацца на сто адсоткаў. Я веру ў поспех — галоўнае, каб і гульцы паверылі. Тады ўсё атрымаецца".

Склад удзельнікаў ўсіх адборачных груп:

А — Нідэрланды, Казахстан, Ісландыя, Латвія, Турцыя, Чэхія;

В — Боснія і Герцагавіна, Андора, Кіпр, Уэльс, Ізраіль, Бельгія;

С — Іспанія, Люксембург, Македонія, Беларусь, Славакія, Украіна;

D — Нямеччына, Гібралтар, Грузія, Шатландыя, Польшча, Ірландыя;

E — Англія, Сан-Марына, Літва, Эстонія, Славенія, Швейцарыя;

F — Грэцыя, Фарэрскія выспы, Паўночная Ірландыя, Фінляндыя, Румынія, Венгрыя;

G — Расія, Ліхтэнштэйн, Малдова, Чарнагорыя, Аўстрыя, Швецыя;

Н — Італія, Мальта, Азербайджан, Балгарыя, Нарвегія, Харватыя;

I — Партугалія, Албанія, Арменія, Сербія, Данія.

 

Фота — AFP