Хакейнае супрацьстаянне Беларусь-ЗША сёлета і ў мінулым годзе — статыстыка

7 траўня беларускія хакеісты на чэмпіянаце свету нечакана разграмілі амерыканцаў з лікам 5:2 і сталі лепшымі ў сваёй групе. Еўрарадыё параўноўвае статыстыку матчаў зборных ЗША і Беларусі на сённяшнім і мінулым чэмпіянатах свету.

У 2014-м за матч амерыканцы кідалі па варотах 25 разоў, сёлета — 30, супраць беларускіх 21 і 23 адпаведна. Але тады наша зборная прайграла з лікам 1:6, а цяпер выйграла 5:2. Летась амерыканскі брамнік ратаваў сваю каманду 20 разоў, сёлета — на два меней. Беларусы ж адбілі 19 шайб дома і 28 у Чэхіі.

Сярэдні ўзрост гульцоў сёлетняй зборнай Амерыкі — 24.1 года, тром самым маладым гульцам па 20 гадоў, двум — па 21, а старэйшаму — 33. У нас двум гульцам па 20 гадоў, аднаму — 21, а самы "стары" гулец зборнай — Аляксей Калюжны (37 гадоў). Беларусаў, якім за 30, у камандзе шасцёра. Сярэдні ўзрост — 27.5.

11 прадстаўнікоў зборнай ЗША гуляюць ў NHL, яшчэ двое — у КХЛ. Чацвёра амерыканцаў вучацца ва ўніверсітэтах, адзін з якіх — у Гарвардзе! У складзе зборнай Беларусі няма ніводнага гульца NHL. Усе акрамя чацвярых выступаюць у КХЛ.

За ўсю гісторыю зборныя Беларусі і ЗША сустракаліся 8 разоў. Цікава, што падчас самага першага матчу ў лютым 1998-га года нашу каманду абыгралі менавіта з лікам 5-2. Да апошняй сустрэчы наша каманда ніяк не магла выйграць у амерыканцаў. Самы разгромны пройгрыш беларускай зборнай адбыўся на Алімпіядзе 2002 года ў Солт-Лэйк-Сіці, дзе гаспадары пляцоўкі перамаглі з лікам 8-1. Самы моцны адпор наша зборная дала амерыканцам на чэмпіянаце свету 2000-га года, прапусціўшы толькі адну шайбу.