Літва не хоча расказваць, як менавіта ўмацоўвае мяжу з Беларуссю
Прэм'ер Літвы: "Не думаю, што трэба заглыбляцца ў нейкія падрабязнасці, як часам робяць нашы калегі з польскага ўрада" / pixabay
Літва ўмацоўвае мяжу з Беларуссю, але не хоча расказваць, як менавіта, піша мясцовае выданне Bernardinai са спасылкай на прэм'ер-міністра краіны Інгрыд Шыманітэ.
"Працуе разведка, <...> сістэма нацыянальнай абароны, праваахоўныя органы. Але я не думаю, што трэба заглыбляцца ў нейкія падрабязнасці, укідаць лічбы ці яшчэ нешта, як часам робяць нашы калегі з польскага ўрада", — цытуе словы літоўскага прэм'ера партал Verslo žinios.
На гэтым тыдні Польшча абвясціла аб планах перакінуць 2 тысячы вайскоўцаў для ўзмацнення мяжы з Беларуссю. Шыманітэ запэўнівае, што літоўскую мяжу таксама ўмацавалі ў адказ на прысутнасць у Беларусі наймітаў "Вагнера".
