Лукашэнку праінфармавалі пра сотні беларусаў, якія пацярпелі ад махляроў
У Беларусі раскрылі буйную сетку махляроў, якая дзейнічала з 2018 года. Па краіне былі створаны некалькі call-цэнтраў, працаўнікі якіх прайшлі навучанне па прыёмах маніпуляцыі свядомасцю людзей. Як інфармуе тэлеканал СТБ, пра гэтую крымінальную гісторыю ўжо праінфармавалі Аляксандра Лукашэнку. Затрыманыя кіраўнікі мінскай фірмы "Амерыкан Бай" і пінскай "Эмісан".
Махлярская схема была пабудавана на сістэме паштовых адпраўленняў. Па тэлефоне беларусу паведамлялі пра бясплатны падарунак да дня нараджэння ці нейкай іншай святочнай даты. Плюс будзе яшчэ і дадатковы падарунак (бранзалет ці кулон). За яго і дастаўку трэба было заплаціць (калі падарунак каштаваў 300 рублёў, то трэба было заплаціць "усяго" 60). Даверлівыя людзі ішлі на пошту, аплочвалі, забіралі пасылку. Аднак у ёй не было абяцанага залатога ланцужка ці швейцарскага гадзінніка, толькі танныя падробкі.
Агульныя страты грамадзян сілавікамі ацэньваюцца больш чым на мільён долараў. Распачатая крымінальная справа.
