Мокры снег і дождж прагназуюць у Беларусі на аўторак

У аўторак, 28 красавіка, у Беларусі чакаецца пераменная воблачнасць, паведамляе Белгідрамет.

Уначы будзе пераважна без ападкаў, зранку і ўдзень у многіх раёнах краіны пройдуць невялікія кароткачасовыя ападкі — мокры снег, дождж. Вецер будзе паўночна-заходні парывісты, месцамі — моцны парывісты.

Уначы ў многіх раёнах прагназуюцца замаразкі ад 0 да -3 градусаў, месцамі мінімальная тэмпература паветра складзе 1-3 градусы са знакам "плюс". Удзень чакаецца 5-11 градусаў цяпла.

У сераду, 29 красавіка, чакаецца пераменная воблачнасць. Будзе пераважна без ападкаў, толькі ўдзень месцамі па паўднёвым усходзе краіны пройдуць невялікія кароткачасовыя ападкі — дождж, мокры снег. Вецер прагназуецца паўночна-заходні, паўночны ўмераны, удзень месцамі — парывісты. 
У сувязі з начнымі замаразкамі сіноптыкі абвясцілі на сераду-чацвер штармавое папярэджанне. На большай частцы тэрыторыі Беларусі ўначы тэрмометры пакажуць 0...-5 градусаў, месцамі будзе 1-3 градусы вышэй за нуль. У Мінску чакаецца 1-3 градусы марозу. Удзень паветра прагрэецца да +5...+10 градусаў.