Нацыянальны стадыён у Мінску будзе мець кітайскі каларыт
Архітэктурнае аблічча Нацыянальнага стадыёна Беларусі ў Мінску будзе мець кітайскі каларыт. Пра гэта 17 лістапада падчас наведвання завода “БелДжы” заявіў Аляксандр Лукашэнка. Паводле яго слоў, стадыён будзе пабудаваны з дапамогай кітайцаў. “Гэта найхутчэй будзе падарунак [кіраўніка КНР] Сі Цзіньпіна…, — цытуе БЕЛТА словы Лукашэнкі. — Я прасіў Сі Цзіньпіна,свайго сябра, каб ён пабудаваў яго з кітайскім каларытам, каб усе, не толькі беларусы, бачылі, што гэта ўзор сяброўства з кітайскім народам”.
Аляксандр Лукашэнка сказаў таксама, што на сённяшні дзень ідзе выбар месца для будаўніцтва. Раней меркавалася, што Нацыянальны стадыён будзе знаходзіцца каля стадыёна “Трактар”, які планавалася рэканструяваць.
