Нападаючы БАТЭ дыскваліфікаваны на тры еўракубкавыя матчы

Нападаючы БАТЭ Віталь Радзівонаў дыскваліфікаваны на тры еўракубкавыя матчы. Такое рашэнне прыняла дысцыплінарная камісія УЕФА. Яна разгледзела эпізод нядаўняга паядынка ў Барысаве паміж БАТЭ і ісландскім "Хабнарф’ёрдзюрам", калі адбылася сутычка паміж Радзівонавым і абаронцам гасцей. Абодва футбалісты былі выдаленыя з поля.

Такім чынам, БАТЭ згуляе ўсе дзве гульні 3-га кваліфікацыйнага раўнду Лігі чэмпіёнаў супраць румынскай “Сцяўа” без свайго найлепшага нападніка.

Прапусціць ён і наступны матч (альбо ў Лізе чэмпіёнаў - у выпадку поспеху БАТЭ, альбо ў Кубку УЕФА - у выпадку паразы барысаўчан ў паядынках са "Сцяўа").

Нагадаем, сёння ў 20 гадзінаў у Барысаве пачнецца першая гульня паміж беларускім і румынскім чэмпіёнамі.

БЕЛТА