Па звестках незалежных назіральнікаў яўка ў Магілёве не перавысіла 25%
Як распавёў Еўрарадыё дырэктар Магілёўскага праваабарончага цэнтра Ўладзімір Краўчанка, яны лічылі выбаршчыкаў цэлы дзень, ад пачатку да канца — "пагалоўна". Па выніковых падліках на ўчасткі, дзе былі назіральнікі ад МПЦ, прыйшло не болей за чвэрць выбаршчыкаў.
Краўчанка: "Напрыклад, на 24-ым выбарчым участку 2923 чалавека, прагаласавала 523 чалавек — 18 працэнтаў выбаршчыкаў. На 25-ым пры агульнай колькасці 2081 чалавек, прыняло ўдзел у галасаванні 422 чалавека, ці 21 працэнт. На 28-ым участку пры агульнай колькасці выбаршчыкаў 2631 прыняло ўдзел у галасаванні 425 чалавек, ці 16 працэнтаў".
У пратакол камісіі запісвалі, што на даму сабралі 400 ці 300 подпісаў, але гэта, кажа Краўчанка, проста фізічна не магчыма.
Кандыдат ў дэпутаты магілёўскага гарсавета Аляксей Паўлоўскі, распавёў Еўрарадыё, што на адным з участкаў, дзе ён балатаваўся, прагаласавала 90 працэнтаў. У такія лічбы кандыдат не верыць і лічыць, што іх значна завысілі.
Паўлоўскі: "Яны напісалі 90 працэнтаў. Я на акрузе сваёй 15 чалавек апытаў і яны ўсе сказалі ўсе што не хадзілі на выбары. І назіральнікі мае казалі, што людзей было вельмі мала".
