Пацвердзілася, што перанос хатніх матчаў ХК "Дынама-Мінск" звязаны з "выбарамі"
Хакей, ілюстрацыйнае фота / vk.com
Перанос хатніх матчаў ХК "Дынама-Мінск" у Кантынентальнай хакейнай лізе, як і меркавалася, звязаны з "выбарамі", прызначанымі на 26 студзеня. Менавіта пад іх будзе выкарыстоўвацца ў студзені "Мінск-Арэна", пішуць "Мінск-Навіны".
Тэарэтычна, гульні можна было арганізаваць у іншым лядовым палацы, і такі варыянт разглядаўся. Але ў "Дынама" заявілі, што вырашылі праводзіць матчы на сваёй арэне дзеля заўзятараў.
Кантынентальная хакейная ліга задаволіла просьбу мінскага клуба і перанесла пяць хатніх матчаў, а таксама адзін выязны.
Перанесеныя наступныя хатнія сустрэчы дынамаўцаў: з "Тарпеда" (6 студзеня замест 18-га), "Куньлунем" (нявызначаная дата замест 20 студзеня), "Спартаком" (27 лютага замест 22 студзеня), "Авангардам" (2 лютага замест 24 студзеня) і "Віцязем" (13 лютага замест 2-га). Выязная гульня са "Спартаком" адбудзецца 23 лютага замест 27-га.
