Еўропа гаворыць з Лукашэнкам, але той адказвае ёй "не". Інсайды ад Латушкі

— Фактычна Беларусь ужо наведвалі прадстаўнікі Францыі, Італіі, Германіі, Польшчы, і, наколькі вядома, чакаюцца візіты і іншых дэлегацый, — сцвярджае кіраўнік НАУ Павел Латушка.

У эфіры Еўрарадыё ён расказаў пра мэту візітаў еўрапейскіх эмісараў у Мінск і санкцыйны ціск, які трэба працягваць.

— Еўрапейскія партнёры хочуць прамацаць сітуацыю, атрымаць зваротную сувязь і зразумець, ці гатовы рэжым да якіх-небудзь змен.

Напрыклад, пасля візіту дэлегацыі з Бруселя нам паведамілі, што афіцыйна гэта былі так званыя тэхнічныя або азнаямляльныя візіты, у рамках якіх ацэньваецца праца еўрапейскіх місій. Аднак, наколькі мне вядома з нашых крыніц, галоўная выснова заключаецца ў тым, што рэжым не гатовы мяняць сваю палітыку.

Пра гэта ўжо гаварылася і раней. Пасля пасяджэння кансультатыўнай групы "Беларусь — Еўрапейская камісія" часовы павераны па справах Беларусі пры Еўрапейскім саюзе агучыў умовы, якія неабходна выканаць: спыніць рэпрэсіі, вызваліць усіх палітычных зняволеных, спыніць гібрыдную агрэсію і падтрымку расійскай агрэсіі супраць Украіны.

Праз два дні ён вярнуўся з адказам: "Не".

Пакуль рэжым прытрымліваецца менавіта такой пазіцыі, ціск неабходна ўзмацняць, упэўнены Павел Латушка.