Пасол Швейцарыі наведаў у калоніі палітзняволеную Наталлю Херше
Наталля Хершэ / svaboda.org
Пасол Швейцарыі ў Беларусі Клод Альтэрмат наведаў у гомельскай калоніі Наталлю Хершэ, пра гэта дыпламат паведаміў у Twitter. Гэта яго другая сустрэча з ёй з пачатку года.
"Сітуацыя для нашай грамадзянкі няпростая", напісаў ён.
Дыпламат таксама адзначыў, што Херше вельмі цэніць падтрымку звонку, і вельмі ўдзячная ўсім за яе.
Heute Nachmittag mein 2. Besuch bei Natallia Hersche in der geschlossenen Arbeitshaftanstalt in Gomel (Belarus). Die Situation ist für unsre Mitbürgerin nicht einfach. Natallia appreciates very much all the support from outside, thanking and greeting all everywhere. pic.twitter.com/zQmYGFIpe9
— Claude Altermatt (@SwissAmbBelarus) May 20, 2021
Наталля Херше — грамадзянка Швейцарыі беларускага паходжання. У пачатку снежня 2020 года яна была асуджаная на 2,5 гады калоніі за супраціў супрацоўніку міліцыі. Падчас жаночага маршу 19 верасня яна сарвала балаклаву з супрацоўніка міліцыі. Сваю віну жанчына не прызнала.
На прыгавор была пададзена апеляцыя, але Мінскі гарадзкі суд адхіліў яе і пакінуў прысуд без зменаў.
У красавіку Наталля Хершэ праз брата прасіла прадпрыемствы і кампаніі, чыім работнікам патрэбна ўніформа, заказваць яе ў гомельскай калоніі. Калі грамадзянскіх заказаў не будзе, яе могуць абавязаць шыць форму для сілавікоў.
Справа Наталлі Херше неаднаразова абмяркоўвалася кіраўнікамі МЗС Беларусі і Швейцарыі, у тым ліку падчас візіту Уладзіміра Макея ў Бэрн месяц таму.
