Павел Латушка заклікае байкатаваць Дзень Расіі ў Мінску
Павел Латушка заклікае байкатаваць Дзень Расіі, які будзе адзначацца ў Мінску канцэртам 11 чэрвеня. На гэты канцэрт анансавалі прыезд расійскіх поп-зорак, якія падтрымліваюць вайну ва Украіне.
Народнае антыкрызіснае ўпраўленне пад яго кіраўніцтвам яшчэ 21 траўня заявіла пра недапушчальнасць "святкавання ў Беларусі Дня Расіі, якая фактычна акупавала нашу краіну".
Латушка падкрэслівае, што байкот Дня Расіі — гэта каштоўнасны выбар і пратэст супраць спробы навязаць беларусам чужое свята. "Гэта пытанне аб геапалітычным выбары, які ва ўмовах вайны супраць Украіны і фактычнай расійскай акупацыі Беларусі паўстаў як ніколі раней", — кажа ён.
"Мы, беларусы — еўрапейскі народ, з еўрапейскім мысленнем і каштоўнасцямі і вялікай прагай да свабоды, незалежнасці і дэмакратыі, за якія мы змагаемся насуперак усім выпрабаванням і за якія ўжо заплацілі велізарны кошт.
Давайце ж пачнем рабіць свой выбар і бараніць сваю незалежнасць. Байкот дня Расіі ці любыя дзеянні па зрыве гэтага мерапрыемства ў Беларусі — гэта адзін з крокаў на гэтым шляху", — заклікае Латушка.
