Пенсіянера аштрафавалі за герб "Пагоня" на балконе (фота)

Напярэдадні велікодных святаў пенсіянер Мар'ян Місевіч з гарадскога пасёлка Падсвілле, што на Глыбоччыне, вырашыў упрыгожыць свой балкон выявай герба "Пагоня". Дарэчы, гэты герб цяпер з’яўляецца не толькі культурна-гістарычнай каштоўнасцю, але і афіцыйным гербам Віцебскай вобласці, распавядае Мар’ян Місевіч:

"Вясной, перад святамі, ёсць такая традыцыя, што людзі наводзяць парадак у дварах, дамах і так далей. І я вырашыў упрыгожыць свой балкон. Я размясціў на 3 м 10 см бел-чырвона-белы фон, па краях даў арнамент беларускі і па цэнтры — герб "Пагоня". Цяпер ён гістарычны і спадзяюся, што ён будзе дзяржаўным рана ці позна. Гэта прыгажосць прастаяла роўна тыдзень".

Мар’ян Місевіч жыве ў прыватным доме, таму кожны дзень у кватэры не бывае. Але перад самымі велікоднымі святамі, праязджаючы каля дома, ён заўважыў, што там штосьці не так. Паводле слоў спадара Мар’яна, "Пагоня" была запэцкана чырвонай фарбай. Пенсіянер стаў разбірацца, і высветлілася, што гэта было зроблена згодна з загадам кіраўніка мясцовай ЖКГ Захарэвіча, які раней кіраваў глыбоцкай міліцыяй.

"Я паехаў да Захарэвіча, ён мяне спачатку прыняў як пан жабрака, але калі я спытаў, на падставе якіх законаў ён так дзейнічаў, ён, мусіць, зразумеў, што перастараўся".

Пасля Мар’яна Місевіча выклікалі ў пасялковы савет. Там яму патлумачылі, што ён сапсаваў фасад будынка, а гэта — адміністрацыйнае парушэнне. Але справа тут не ў фасадзе, а ў сімволіцы, лічыць Мар'ян Місевіч:

"Усе людзі — у тым жа самым доме, у іншых дамах — будуюць лоджыі, перафарбоўваюць балконы і так далей, і ні ў каго няма ніякага дазволу".

21 траўня Мар’яна Місевіча аштрафавалі на 200 тысяч рублёў. Цяпер пенсіянер вырашае, выплачваць штраф ці абскарджваць яго.

Рубрыка “Самаабарона” спецыяльна для праграмы Кардыяграма